Saturday, 18 August 2018

Robredo kay Pangulong Duterte: "Ako na lang tirahin mo, huwag ang Naga"


Malaking insulto sa mga dati at kasalukuyang opisyal ng Naga City ang pahayag ni Pangulong Rodrigo Duterte na minsan naging ‘hotbed of shabu’ ang lungsod.

Ito ang reaksyon ni Vice President Leni Robredo at aniya malaking insulto sa kanyang mga kababayan ang naging pahayag ni Pangulong Duterte.

“Sa akin kasi insultong napakalaki nun sa mga taga-Naga. Alam natin ‘yung effort na ginagawa para maging maayos ang ating pangalan,” ang sabi ni Robredo, kasabay ng pagdiriwang ng ika-6 taon ng kamatayan ng kanyang asawang si dating Interior Sec. Jesse Robredo.

Ang dating kalihim na nasawi sa isang plane crash noong 2012 ay ilang taon na nagsilbing mayor ng Naga City.

Dagdag pa ni Robredo, na siya na lang dapat ang tirahin ni Pangulong Duterte at huwag nang idamay ang iba.

“Ako na lang sana ‘yung siraan kasi kung ako naman ‘yung puntirya ako na lang, kasi walang ibang madadamay ako lang. Para sabihin mo ‘yung Naga tayo ‘yun lahat eh,” diin ni Robredo.

Una nang nagpasa ng resolusyon ang Sangguniang Panglungsod para kondenahin ang naging pahayag ng Punong Ehekutibo.

Noong nakaraang Martes sa talumpati ng Pangulo, sinabi nito na ang balwarte ni Robredo ay minsan naging ‘hotbed ng shabu’ kasabay ng muling pagmamaliit sa kakayahan sa pamumuno ng kanyang bise presidente.

source:abante

1 comments: